کوئٹہ،04 فروری(اے پی پی): وزیراعلیٰ بلوچستان میر عبدالقدوس بزنجو سے ہفتہ کو یہاں وفاقی سیکرٹری پلاننگ سید ظفر علی شاہ نے ملاقات کی ہے۔ ملاقات میں صوبے میں جاری وفاقی ترقیاتی منصوبوں کی پیشرفت کا جائزہ لیا گیا اور نئے ترقیاتی منصوبوں کو آئندہ سال کی وفاقی پی ایس ڈی پی میں شامل کرنے اور جنوبی بلوچستان ترقیاتی پیکج پر عمل درآمد اور گوادر کی ترقی سمیت دیگر باہمی دلچسپی کے امور پر تبادلہ خیال کیا گیا۔
ملاقات میں وزیراعلیٰ بلوچستان میر عبدالقدوس بزنجو نے کہا کہ این ای سی کے فیصلے جس میں ترقیاتی سکیموں پر نظر ثانی کی جاتی ہے سے بلوچستان کو استثناء دیا جائے۔انہوں نے کہا کہ صوبائی حکومت کی 15 ترقیاتی اسکیمیں، سی ڈی ڈبلیو پی اور ایکنک میں التوا کا شکار ہیں ان پر بھی بظر سانی کی جائے اور رواں مالی سال کوئٹہ کراچی روڈ کے لئے دوبارہ اختصاص کے ذریعے خاطر خواہ فنڈز فراہم کیے جائیں۔
وزیراعلیٰ بلوچستان کا یہ بھی کہنا تھا کہ جنوبی بلوچستان ترقیاتی پیکیج میں شامل منصوبوں کے لیے فنڈز کا اجراء کیا جائے تاکہ منصوبوں پر کام شروع کیا جا سکے۔انہوں نے بتایا کہ حکومت بلوچستان نے وفاقی فنڈز کی وصولی کی توقع میں متعدد وفاقی منصوبوں کو برج فنانسنگ کے طور پر تقریباً پانچ ارب روپے فراہم کیے ہیں اور ایسی تمام سکیموں کی فہرست صوبائی محکمہ منصوبہ بندی و ترقیات وفاقی حکومت کے ساتھ شیئر کر سکتا ہے۔
وزیراعلیٰ کا کہنا تھا کہ گوادر ہمارا مستقبل کا معاشی حب ہے اورگوادر کی ترقی کے لئے ضروری ہے، وہاں کے شہریوں کو تمام بنیادی سہولیات اور ضروریات زندگی فراہم کی جائیں۔انہوں نے کہا کہ ہم نے گوادر کےعوام کی سہولت کے لیے کئی ایک منصوبے شروع کیے ہیں ان منصوبوں میں پانی اور بجلی کی فراہمی سمیت جی ڈی اے کے زیر انتظام ہسپتال کو انڈس ہسپتال کے حوالے کیا گیا ہے۔
وفاقی سیکریٹری پلاننگ نے کہا کہ وزیراعلیٰ بلوچستان اور صوبائی حکومت کی کارکردگی قابل تعریف ہے اور صوبے میں وفاقی ترقیاتی منصوبوں پر عمل درآمد کا کریڈٹ وزیراعلیٰ کی قائدانہ لیڈر شپ اور ان کی ٹیم کو جاتا ہے ۔ان کا یہ بھی کہنا تھا کہ وفاقی حکومت صوبے میں جاری ترقیاتی منصوبوں کو مکمل کرنے میں بھرپور دلچسپی رکھتی ہے اور بلوچستان سے بیس ہزار طلباء کو وزیراعظم لیپ ٹاپ سکیم میں بھی شامل کیا گیا ہے اور پانچ ہزار طلباء کے لیے اسکالر شپ بھی رکھے گئے ہیں جبکہ پانچ ہزار نوجوانوں کی انٹرن شپ بھی دی جائےگی ۔
ملاقات میں بلوچستان میں جاری وفاقی ترقیاتی منصوبوں پر پیشرفت کو تیز کرنے اور وفاق اور صوبے میں باہمی تعاون کو مزید فروغ دینے پر اتفاق کیا گیا۔
ملاقات میں وفاقی سیکرٹری مذہبی امور ڈاکٹر آفتاب اکبر اور صوبائی وزراء نور محمد دمڑ، انجینئر زمرک خان اچکزئی ایڈیشنل چیف سیکرٹری منصوبہ بندی وترقیات حافظ عبدالباسط اور وزیراعلیٰ کے پرنسپل سیکریٹری عمران گچکی بھی اس موقع پر موجود تھے۔
