پشاور،18اپریل(اے پی پی):صوبائی وزیر تعلیم فیصل خان ترکئی کا گورنمنٹ ہائر سیکنڈری سکول سٹی نمبر ون پشاور کے امتحانی ہال کا دورہ کیا وزیر تعلیم نے امتحانی نظام کا جائزہ لیا اور طلباء کے لیے نیک خواہشات کا اظہار کیا۔ انہوں نے کہا کہ صوبہ بھر میں شفاف امتحانات کو منعقد کرنے کے لیے عملی اقدامات کر رہے ہیں۔ انہوں نےسپروائزری سٹاف کو ہدایات دیتے ہوئے کہا کہ صوبہ بھر کا امتحانی عملہ امتحانات کو کامیاب اور شفاف بنانے کے لیے اپنا کردار ادا کریں۔ معماران قوم کا مستقبل اب آپ کے ہاتھ میں ہے کوشش کریں کہ میرٹ پر حقدار کو اس کا حق ملے، میٹرک میں عمومی طور پر چھوٹے بچے ہوتے ہیں ان کے ساتھ شفقت کا رویہ رکھیں۔ یہ ہدایات انہوں نے جاری میٹرک امتحانات کا جائزہ لینے کیلئے گورنمنت ہائیر سیکنڈری سکول سٹی نمبر ون پشاور دورے کے موقع پر جاری کی۔ سیکرٹری ایجوکیشن مسعود احمد، سپیشل سیکرٹری اسفندیار خٹک اور چیئرمین پشاور تعلیمی بورڈ نصراللہ بھی ان کے ہمراہ تھے۔
وزیر تعلیم نے مزید کہا کہ میں بطور وزیر تعلیم میری ٹیم اورسیکرٹیریٹ کی ٹیمیں صوبہ بھر کے امتحانی حالوں کا جائزہ لے رہی ہیں، اور امتحانی نظام میں کوئی بھی کوتاہی برداشت نہیں ہوگی اور خلاف ورزی کرنے والوں کے خلاف سخت کارروائی ہوگی۔
انہوں نے مزید کہا کہ تمام تعلیمی بورڈز کی تیاریاں مکمل ہیں، والدین اور طلبہ مطمئن رہیں ان کو اپنی محنت کا صلہ ملے گا۔ اور ہمیں امید ہے کہ ہمارے میرٹ کے نظام سے گزرنے والے بچے آگے جا کر ملک کی بہتر خدمت کریں گے۔ انہوں نے کہا کہ کامیاب اور میرٹ بیسڈ امتحانات کیلئے ہمیں ضلعی انتظامیہ ،پولیس، واپڈا اور دیگر اداروں کی بھرپور معاونت حاصل ہے۔
وزیر تعلیم نے جاری امتحانات کے حوالے سے کہا کہ امسال صوبہ بھر سے 8 لاکھ 93ہزار 524 طلباء و طالبات میٹرک کے امتحانات میں حصہ لے رہے ہیں۔ اس میں کلاس نہم کے چار لاکھ 57 ہزار اور دہم کے چار لاکھ 35 ہزار طلباء و طالبات امتحانات میں حصہ لے رہے ہیں اور صوبہ بھر میں کل 3569 امتحانی ہال قائم کیے گئے ہیں، اسی طرح امتحانات میں ہمیں صوبہ بھر سے تقریبا 24 ہزار سپروائزری عملے کی خدمات حاصل ہیں۔ امتحانات کو کامیاب اور شفاف بنانے اور شکایات کی ازالے کے لیے محکمہ تعلیم میں انفارمیشن ڈیسک بھی قائم کیا گیا ہے۔
وزیر تعلیم نے سیکرٹیریٹ میں قائم مانیٹرنگ سیل کا بھی دورہ کیا اور صوبہ بھر کے امتحانی ہالز کا جائزہ لیا۔ اور موقع پر ہدایات جاری کی۔
