لاہور،2مئی (اے پی پی):وزیر ٹرانسپورٹ بلال اکبر خان سے برطانوی ہائی کمیشن لاہور آفس کی ہیڈ کلارا سترادج نے ملاقات کی اور دوطرفہ باہمی دلچسپی کے امور پر گفتگو وصوبے میں جاری پراجیکٹس پر تعاون بڑھانے کیلئے تبادلہ خیال کیا۔
صوبائی وزیر نے صوبے میں جاری مختلف پراجیکٹس اور ترجیحات بارے آگاہ کرتے ہوئے کہا کہ طلبہ کو آسان سفری سہولیات فراہم کرنے کیلئے پنجاب حکومت نے بائیکس سکیم شروع کی ہے۔انہوں نے کہاکہ ہماری کوشش ہے کہ طلبہ کو ہر حد تک سفری سہولیات فراہم کریں، خواتین کے ٹرانسپورٹیشن کے مسائل حل کرنے کی طرف بھی خصوصی توجہ ہے،اسی طرح عوام کیلئے الیکٹرک بسوں سمیت دیگر میگا پراجیکٹس پر بھی کام جاری ہے۔
صوبائی وزیر کا مزید کہنا تھا کہ دیگر پراجیکٹس کے ساتھ ساتھ ٹرانسپورٹ کے شعبہ میں بھی برطانیہ کے تعاون کو قدر کی نگاہ سے دیکھتے اور برطانیہ کے جدید ٹرانسپورٹیشن تجربات سے استفادہ کرنا چاہیں گے۔
اس موقع پر کلارا سترادج نے حکومت پنجاب کیساتھ مختلف پراجیکٹس اور امور پر مل کر کام کرنے کے عزم کا اظہار کیا۔
