لاہور 28اگست(اے پی پی) سینٹ کی قائمہ کمیٹی برائے ہاؤسنگ اینڈ ورکس کے چیئرمین سینیٹر ناصر بٹ نے کہا ہے کہ قومی ترقی کے سفر میں تمام سیاسی قوتوں کو مثبت اور تعمیری کردار ادا کرنا ہوگا، حکومت ملک کی ترقی کے ایجنڈے پر کام کر رہی ہے اور یہ سفر عوامی خوشحالی کے لیے جاری رہےگا۔ وہ جمعرات کو چمبا ہاؤس میں کمیٹی کے اجلاس کے بعد میڈیا سے گفتگو کر رہے تھے۔ انہوں نےکہاکہ موجودہ حکومتی اتحاد نے وقت کے ساتھ مل کر سیکھا اور پاکستان کی ترقی کے لیے یکجہتی کے ساتھ کام کیا ہے۔انہوں نے کہا کہ موجودہ حکومت کے پاس کوئی سیاسی قیدی نہیں، صرف وہ افراد زیر تفتیش ہیں جو قانون شکن واقعات میں ملوث پائے گئے۔ایک سوال کے جواب میں انہوں نے کہا کہ 190 ملین پاؤنڈ کا معاملہ برطانیہ میں ملک ریاض اور نیشنل کرائم ایجنسی سے متعلق تھا، جسے اس وقت کی حکومت نے سپریم کورٹ کے اکاؤنٹ میں منتقل کیا۔ اس سلسلے میں حکومتی اتحاد نے شفافیت اور قانونی تقاضوں کو مقدم رکھا۔ قبل ازیں کمیٹی اجلاس میں چمبا ہاؤس کی اراضی کے حوالے سے اہم فیصلے کیے گئے۔ یہ طے کیا گیا کہ مقیم افراد کو اپنی ملکیت کے ثبوت دینا ہوں گے، بصورت دیگر جگہ خالی کرنا ہوگی اور اس حوالے سے کسی دباؤ کو قبول نہیں کیا جائے گ۔اجلاس سے قبل کمیٹی ارکان نے چمبا ہاؤس، وفاقی کالونی اور فیڈرل لاجز فلیٹس کا دورہ کیا۔ پنجاب پولیس نے کمیٹی کو وفاقی کالونی میں حال ہی میں واگزار کرائے گئے 12 رہائشی یونٹس کے بارے میں آگاہ کیا۔
