پشاور،8نومبر(اے پی پی): خواتین لکھاریوں کیلئے پہلے 5 روزہ “پشاور لٹریری فیسٹیول” کی شروعات بینظیر ویمن یونیورسٹی میں ہوگئی ہے۔
فیسٹیول کی افتتاحی تقریب ڈسٹرکٹ کونسل ہال میں بینظیر ویمن یونیورسٹی اور دوستی ویلفیئر آرگنائزیشن کے اشتراک سے منعقد ہوئی، جس کا بنیادی مقصد خواتین اور ادب کے درمیان گہرے تعلق کو فروغ دینا تھا۔
تقریب میں میئر پشاور حاجی زبیر علی نے بطور مہمان خصوصی شرکت کی، جبکہ پروگرام کی مہمان خصوصی وزیر اعلیٰ خیبر پختونخوا کی شریک حیات پروین اعظم خان تھیں۔
فیسٹیول کے دوران، بے نظیر ویمن یونیورسٹی کی وائس چانسلر، پروفیسر ڈاکٹر صفیہ نے باضابطہ طور پر شرکاء کا خیرمقدم کیا اور مختلف مقامات پر 50 متنوع سیشنز کے منصوبوں کا اعلان کیا۔
تقریب کی مہمان خصوصی پروین اعظم خان نے خواتین کے متنوع لسانی پس منظر پر زور دیا جن میں پشتو، اردو، ہندی اور دیگر علاقائی زبانیں شامل ہیں۔
تقریب کے دوران معروف ٹی وی اور ریڈیو اینکر اور مصنفہ بشریٰ فرخ نے ادب میں خواتین کی تصویر کشی پر روشنی ڈالتے ہوئے اس طرح کے اجتماعات کی اہمیت کو اجاگر کیا۔
اپنی تقریر میں، پشاور کے میئر حاجی زبیر علی نے خواتین کے لیے مخصوص پارکس بنانے کے لیے کوششوں کا ذکر کیا اور مستقبل میں بھی خواتین کے لیے اسی طرح کی تقریبات کا انعقاد جاری رکھنے کا ارادہ ظاہر کیا۔ انہوں نے مختلف سماجی سرگرمیوں میں خواتین کے ناگزیر کردار کا اعتراف کیا اور نہ صرف ادب بلکہ زندگی کے تمام پہلوؤں میں ان کی کامیابیوں کو اجاگر کیا۔
فیسٹیول میں صوبہ بھر سے خواتین ادیبوں اور ادب کے شائقین نے جوش و خروش سے شرکت کی جبکہ میلے میں خواتین شاعروں کی تخلیقات اور نظمیں پیش کی گئیں۔
