اسلام آباد،08نومبر(اے پی پی ):غیرمعمولی طور پر شدید بارشوں کے تباہ کن نتائج سے نمٹنے والی کمیونٹیز کی اہم ضرورتوں کو پورا کرتے ہوئے شاہ سلمان ہیومینٹیرین ایڈ اینڈ ریلیف سینٹر نے ایک اہم امدادی منصوبہ کامیابی سے مکمل کر لیا ہے۔ اس منصوبے کا مقصد صوبہ پنجاب میں مقیم افراد کو 4,000 شیلٹر غیر غذائی کٹس فراہم کرنا ہے جو حالیہ سیلاب سے شدید متاثر ہوئے ہیں، جن میں پنجاب کے سب سے زیادہ متاثر ہونے والے چار اضلاع قصور، وہاڑی، لیہ اور راجن پور شامل ہیں۔
یہ ہنگامی امدادی منصوبہ شاہ سلمان ہیومینٹیرین ایڈ اینڈ ریلیف سینٹر شیلٹر غیر غذائی پروجیکٹ کا سال 2023-2024 کا ایک جز ہے۔ ان کٹس میں 4,000 شیلٹر، 4,000 سولر پینل، 4,000 کچن سیٹ، 4,000 پلاسٹک میٹ اور 8,000 کمبل شامل ہیں۔ اس منصوبے کو حیات فاؤنڈیشن نے مقامی حکومت کے تعاون سے عملی جامہ پہنایا اور اس منصوبے سے چاروں اضلاع میں 28,000 سے زائد افراد مستفید ہوئے ہیں۔
