لاہور، 2 ستمبر(اے پی پی): وزیر محکمہ لائیو سٹاک پنجاب ابراہیم مراد نے کہا ہے کہ ہمارا ہدف ملکی برآمدات کو 500 ملین ڈالر سے بڑھا کر 15 ارب ڈالر تک لے جانا ہے،موجودہ حالات میں ملک کو اس مشکل معاشی دور سے نکالنے کیلئے برآمدات میں اضافہ کرنا ہو گا۔
ان خیالات کا اظہار انہوں نے ویٹرنری ڈاکٹرز ایسوسی ایشن پنجاب کے وفد سے گفتگو میں کیا، وزیر محکمہ لائیو سٹاک پنجاب ابراہیم مراد نے ملاقات میں صوبے بھر میں ویٹرنری ڈاکٹرز کی زیرِ التوا پروموشن کے معاملات کا نوٹس لے لیا۔ انہوں نے کہا کہ جن ویٹرنیری ڈاکٹرز کی پروموشن التوا کا شکار ہیں انہیں ان کا حق دلوائیں گے، جو لوگ محنت اور لگن سے کام کرتے ہیں انہیں حقوق کی فراہمی یقینی بنانا ضروری ہے۔
ابراہیم مراد نے کہا کہ پاکستان کی معاشی ترقی زراعت اور لائیو سٹاک کے شعبوں سے بڑے پیمانے پر منسلک ہے، لائیو سٹاک و ڈیری کے شعبے میں انقلابی تبدیلیاں رونما ہونے جا رہی ہیں، محکمہ لائیو سٹاک ٹیکنالوجی اور جدید و ماڈرن فارمنگ کے ذریعے ملکی معیشت کے استحکام کے لئے کام کرے گا۔انکا کہنا تھا کہ ہمیں ایسے منصوبوں پر کام کرنا ہے جس میں کم وقت میں زیادہ مثبت نتائج حاصل کیے جا سکیں۔
